આણંદના તત્કાલીન કલેક્ટરની ચેમ્બરમાં કથિત સ્પાય કેમેરા લગાડવાના કેસમાં આરોપી કેતકી વ્યાસને સુપ્રીમ કોર્ટમાંથી રાહત મળી છે. સુપ્રીમ કોર્ટે ગુજરાત હાઇકોર્ટના આદેશ પર સ્ટે આપતાં આગામી સુનાવણી સુધી હાઇકોર્ટના આદેશના અમલ પર રોક લગાવી છે.
આ સમગ્ર મામલો તત્કાલીન આણંદ કલેક્ટર ડી.એસ. ગઢવીની ચેમ્બરમાં ગુપ્ત રીતે સ્પાય કેમેરા લગાડવામાં આવ્યા હોવાના આરોપો સાથે જોડાયેલો છે. તપાસ એજન્સીઓના જણાવ્યા અનુસાર, કલેક્ટરની ચેમ્બરમાં કેમેરા લગાવી કથિત રીતે વીડિયો રેકોર્ડ કરવામાં આવ્યા હતા અને બાદમાં તે વીડિયોના આધારે બ્લેકમેઈલ કરવાનો પ્રયાસ કરવામાં આવ્યો હોવાનો આરોપ છે. આ કેસમાં કેતકી વ્યાસનું નામ પણ આરોપી તરીકે સામે આવ્યું હતું.
બીજી તરફ, કેતકી વ્યાસ સામે ભ્રષ્ટાચાર નિવારણ અધિનિયમ હેઠળ પણ અલગ ગુનો નોંધાયેલો છે. ACBની તપાસમાં તેમની આવક કરતાં અંદાજે ₹3.56 કરોડની વધુ બિનહિસાબી સંપત્તિ મળી આવી હોવાનું જણાવાયું છે. તપાસ મુજબ આ સંપત્તિ તેમની જાણીતી આવક કરતાં આશરે 68.84 ટકા વધુ હોવાનું પ્રાથમિક તારણોમાં સામે આવ્યું છે.
તપાસ એજન્સીઓના આક્ષેપ મુજબ, વર્ષ 2012થી 2023 દરમિયાન જાહેર સેવક તરીકેની ફરજ દરમિયાન સત્તાનો દુરુપયોગ કરીને પોતાના તથા પરિવારજનોના નામે સ્થાવર અને જંગમ મિલકતો ઉભી કરવામાં આવી હતી. હાલ આ મામલાની કાનૂની કાર્યવાહી ચાલુ છે અને સુપ્રીમ કોર્ટમાં આગામી સુનાવણી બાદ આગળની સ્થિતિ સ્પષ્ટ થશે.